Kvennalið Breiðabliks stendur öðrum liðum í þremur efstu deildum á Íslandi framar er kemur að varnarleik. Liðið hefur ekki fengið á sig mark í efstu deild kvenna í sumar. Þær hafa jafnframt skorað 28 mörk. Kvennalið HK, sem spilar í 2. deild, hefur skorað 32 mörk, flest allra liða í þremur efstu deildunum á Íslandi, og fengið á sig eitt.

Sonný Lára Þráinsdóttir stendur í marki Breiðabliks. Samkvæmt samantekt Vísis hefur hún aðeins fengið á sig 64 mörk í þeim 114 deildarleikjum sem hún hefur spilað fyrir Breiðablik síðan hún gekk til liðs við liðið árið 2014. Hún hefur haldið hreinu í 67 leikjum.

Markaskorun Breiðabliks hefur verið dreifð í sumar. Berglind Björg Þorvaldsdóttir er markahæst Blika með 11 mörk. Sveindís Jane Jónsdóttir hefur skorað sex mörk og Alexandra Jóhannsdóttir hefur skorað fimm mörk.

Í marki HK stendur Hrafnhildur Hjaltalín. Hún kom til liðsins frá Fjölni fyrir tímabilið. HK fékk eitt mark á sig í öðrum leik tímabilsins á móti Álftanesi. Síðan þá hafa þær haldið hreinu, í fimm leiki í röð. Tveir leikmenn HK hafa að mestu leyti séð um markaskorun HK. María Lena Ásgeirsdóttir hefur skorað 11 mörk og Karen Sturludóttir hefur skorað 9 mörk. María Lena er fædd árið 2002 og er því 18 ára.