„Við fengum mjög ítarlegan spurningalista frá Knattspyrnusambandinu,“ sagði Víðir á fundinum. „Þeir eru að skoða alla möguleika á því hvernig þeir geti hagað starfseminni. Það er mikið undir hjá KSÍ, ekki bara Íslandsmótin, það eru Evrópukeppnir félagsliða og stórir landsleikir framundan,“ sagði hann enn fremur.
Á morgun mun Víðir hitta forsvarsmenn KSÍ og ræða málið og kemur það þá vonandi í ljós hvernig hlutum verður háttað þegar kemur að íslenskri knattspyrnu í faraldrinum. Forsvarsmenn KSÍ munu ábyggilega reyna að fá það í gegn að leikir verði spilaðir með svipuðu móti og sést hefur úti, það er án aðdáenda.
„Staðan er bara mjög óljós eins og er og erfitt að svara sumum spurningum sem þar hafa verið settar fram eins og fyrsti Evrópuleikurinn er 18. ágúst og síðan er landsleikir í lok ágúst og byrjun september,“ sagði Víðir einnig.
„Á meðan erum við að meta stöðuna frá degi til dags, við munum hitta forsvarsmenn KSÍ á morgun og vonandi getum við veitt svör við einhverjum af þeim spurningum sem þeir hafa, en það er ekki víst að þau verði öll á þá lund sem þeim langar til.“
