Guðni Bergsson, formaður KSÍ segist vera bjartsýnn á að Íslandsmótið verði klárað þrátt fyrir kórónuveirufaraldurinn. Guðni ræddi um málið í útvarpsþættinum Fótbolti.net á X-inu 977.

Knattspyrnuleikjum á Íslandi hefur verið frestað til 5. ágúst en yfirvöld vilja fresta öllum íþróttum og æfingum sem innihalda snertingu til 13. ágúst. „Við erum búin að gefa út reglugerð þar sem við kveðum á að við ætlum að gefa okkur alla vega til 1. desember til að klára mótið ef við þurfum á að halda,“ sagði Guðni í þættinum. „Ef okkur seinkar um eina til tvær vikur þá gerir það okkur erfiðara fyrir en við höfum tíma upp á að hlaupa. Nú er lykilatriði að við náum tökum á þessum faraldri, pössum okkur vel og notum sóttvarnarúrræði.“

KSÍ setti reglugerð í ár sem segir að einungis þarf að klára 2/3 af Íslandsmótinu svo hægt sé að krýna sigurvegara auk þess til að vita hverjir falla og fara upp um deildir. Þó verður ekki leikið lengur en til 1. desember. „Við vildum ekki alveg fara fram að jólum eða inn í næsta ár. Við töldum að 1. desember væri gott viðmið og svo erum við með þetta viðmið að við viljum alla vega klára 2/3 leikja svo að mótin verði í raun og veru gild. Ég held að það hafi verið gott að vera búin að setja þessa reglugerð.“