Hér fyrir neðan má sjá hvernig leikir dagsins fóru:
KR 1-2 FH
FH byrjaði leikinn betur og náði Daníel Hafsteinsson að koma liðinu yfir um miðjan fyrri hálfleik. Kristján Flóki Finnbogason náði þó að jafna metin fyrir Vesturbæjarliðið skömmu áður en flautað var til hálfleiks og var staðan því jöfn þá. Þegar um klukkutími var liðinn af leiknum kom Ólafur Karl Finsen inn á í sínum fyrsta leik fyrir FH en hann gekk til liðs við þá í vikunni. Daníel Hafsteinsson skoraði síðan sitt annað mark eftir um 75 mínútur og reyndist það vera sigurmark leiksins.
Lokaniðurstaðan því 1-2 fyrir FH sem hefur enn ekki tapað leik eftir að Logi Ólafsson og Eiður Smári Guðjohnsen tóku við liðinu.
Stjarnan 1-1 Grótta
Stjörnunni hefur gengið afar vel eftir að liðið byrjaði aftur að spila eftir sóttkví og virtist liðið vera bara betra eftir hana. Grótta, sem situr í næst neðsta sæti deildarinnar, náði þó að standa í þeim í dag. Guðjón Pétur Lýðsson kom Stjörnumönnum yfir um miðjan fyrri hálfleik og virtist vera sem Stjarnan myndi sækja auðvelda þrjá punkta gegn Gróttu. Þeir voru meira með boltann og áttu fleiri hættulegar sóknir í leiknum en þrátt fyrir það náði Grótta að jafna leikinn þegar um korter var eftir af venjulegum leiktíma.
Mörkin urðu ekki fleiri og lokaniðurstaðan því 1-1 jafntefli og Gróttumenn fara heim með mikilvægt stig.