Vísir greinir frá því í dag að áhorfendur verði leyfðir á leikjum en skipta þarf upp stúkunni í 100 manna hólf. Þá þarf einnig að virða tveggja metra regluna og fólk má ekki blandast á milli hólfa. Einnig þarf að vera sér salernisaðstaða fyrir hvert hólf auk þess sem veitingasala þarf að vera skipt ef hún er til staðar.
„Ég fagna því að íþróttastarf í landinu geti verið með næstum eðlilegum hætti að nýju, en minni jafnframt á mikilvægi þess að hvert og eitt okkar sinni áfram samfélagslegri skyldu varðandi sóttvarnir og samskipti við aðra,“ segir Lilja Dögg Alfreðsdóttir, mennta- og menningarmálaráðherra í tilkynningu sem birtist á heimasíðu ríkisstjórnarinnar í dag.
„Við erum á góðri siglingu, en það þarf lítið til að rugga bátnum og stefna samfélagslegri virkni í voða. Íþróttafólk hefur sýnt ábyrgð og mun áfram fylgja ströngum reglum innan vallar og utan, svo hér geti íþróttalíf blómstrað samhliða sjálfsögðum sóttvarnarreglum.“