Celtic hefur fordæmt hegðunina hjá Bolingoli. Bolingoli ferðaðist nýverið til Spánar og sagði ekki liðinu frá því. Þegar hann kom til baka átti hann að fara í 14 daga sóttkví en gerði það ekki. Þá kom hann inn á sem varamaður í leik Celtic gegn Kilmarnock þegar hann átti að vera í sóttkví. Þjálfari Celtic, Neil Lennon, segist ekki hafa vitað að Bolingoli hafi verið í útlöndum þegar hann setti hann inn á í leiknum
Liðið hefur beðist afsökunnar á Bolingoli í tilkynningu en þar segir einnig að „það sé erfitt að ímynda sér óábyrgari hegðun í núverandi ástandi“. Þá baðst Bolingoli einnig afsökunnar á hegðun sinni. „Ég gerði risastór mistök. Ég vil biðja þjálfarann minn, liðsfélaga mína, stuðningsmennina og alla hjá liðinu afsökunnar. Ég veit að það sem ég gerði var rangt og ég veit að ég mun þurfa að taka á móti afleiðingunum.“
Það er þó ekki víst að þessar afsökunarbeiðnir dugi til að halda skoska boltanum gangandi. Þetta er nefnilega ekki í fyrsta skipti sem reglurnar eru brotnar eftir að deildin fór aftur af stað. Tveir leikmenn Aberdeen smituðust af Covid-19 eftir að hópur í liðinu fór út að borða saman. Forsætisráðherra Skotlands, Nicola Sturgeon, var allt annað en sátt eftir fréttirnar af leikmönnum Aberdeen. „Þeir brutu reglurnar vísvitandi, reglur sem allir voru búnir að samþykkja, það er algjörlega óásættanlegt. Fótboltinn fékk að fara aftur af stað með því eina skilyrði að leikmenn og lið myndu fara eftir reglunum,“ sagði forsætisráðherran.
Forsætisráðherran hefur boðað til blaðamannafundar í dag og búast margir við að hún gæti verið að tilkynna að deildin verði flautuð af í þetta sinn.