FH hefur einungis sólarhring til að svara UEFA hvort hægt verði að spila leik FH gegn Dunajska Streda í undankeppni Evrópudeildarinnar hér á landi. Sem stendur eru fótboltaleikir ekki leyfðir hér á landi en leikur FH á að fara fram þann 27. ágúst næstkomandi.

Valdimar Svavarsson, formaður knattspyrnudeildar FH, ræddi við Fótbolta.net um málið og sagði að félagið væri í sambandi við Lilju Dögg Alfreðsdóttur mennta- og menningarmálaráðherra varðandi málið. „Við eigum fund með ráðherra, KSÍ og fleirum núna klukkan 13. Við þurfum bara setja allt í gang núna til að ryðja öllum hindrunum úr vegi. Við viljum leika á okkar heimavelli og þurfum að fá ígildi undanþágu eða skilning á því að þetta sé gert með þessum hætti. Þetta er það sem við erum að vinna í og þurfum að fá svar við sem allra fyrst.“

Valdimar segir að FH sé að skoða það að keppa leikinn á einhverju af Norðurlöndunum en það er plan B. Hann vekur þó athygli að Evrópukeppnin er hluti af alþjóðlegu samstarfi og vonar hann að sjónarmið verði eftir því. „Þetta er UEFA keppni, hluti af alþjóðlegu samstarfi í fótboltanum. Ef þetta væri landsleikur, yrði þá staðið í vegi fyrir honum? Ég vona að svipuð sjónarmið verði uppi. Það eru miklir hagsmunir í húfi.“