Kristinn Jakobsson, fyrrum dómari, ræddi við RÚV um helgina eftir leik KR og Víkings R. á laugardaginn.
Helgi Mikael, dómari leiksins, var í umræðunni eftir að hafa gefið Víkingum heil þrjú rauð spjöld í leiknum.
Kári Árnason, Sölvi Geir Ottesen og Halldór Smári Sigurðsson fengu allir beint rautt spjald hjá Víkingum í leik sem tapaðist 2-0.
Í viðtalinu við RÚV þá segir Kristinn að Helgi hafi gert rétt með að reka Kára og Sölva af velli.
„Samkvæmt bókinni er það hárrétt spjald. Brotið sem slíkt er ekki harkalegt en leikmaðurinn er kominn einn í gegn og Kári tekur í hann sem verður til þess að Kristján Flóki lætur sig falla niður á auðveldan hátt en brotið er slíkt; einn í gegn í upplögðu marktækifæri. Það er bara hreint og klárt rautt í mínum huga og ég held að Helgi Mikael hafi gert rétt í því atviki,“ sagði Kristinn við RÚV.
Spjald Sölva var ansi umdeilt en Pablo Punyed ýtti í bakið á varnarmanninum sem fór svo með hendina í andlit Stefáns Árna Geirssonar.
Kristinn segir þó að Helgi hafi gert rétt með að reka Sölva af velli og að gefa Pablo gult spjald.
„Miðað við hvernig ég sá það á vellinum þá veitir Pablo honum smá ýtingu í bak, Sölvi fellur við og slær til leikmanns KR, í andlitið á honum. Mér fannst það alltaf rautt spjald en Pablo uppsker líka áminningu fyrir að hafa ýtt honum. Þannig að ég tel að sú heildarniðurstaða hjá Helga Mikael hafi verið rétt líka,“ segir Kristinn.
Kristinn heldur áfram og segir að Helgi hefði mögulega getað sleppt því að reka Halldór af velli.