Landsliðsmaðurinn Jóhann Berg Guðmundsson vonar að meiðslavandræðin sem hann hefur verið að glíma við séu búin. Jóhann spilar með Burnley í efstu deild Englands og var í byrjunarliðinu í síðustu leikjum leiktíðarinnar í ensku deildinni.

„Þegar þú meiðist illa er yfirleitt vitað hvort maður sé meiddur í 6 mánuði eða 5 mánuði eða hvað það er, þá veistu allavega hversu lengi þú getur ekki spilað,“ sagði Jóhann í viðtali við heimasíðu Burnley. „Hjá mér er þetta öðruvísi því ég er búinn að vera að glíma við mikið af meiðslum í vöðvum. Ég meiðist, lagast síðan, kem aftur og meiðist þá aftur. Það hefur verið mjög erfitt.“

Jóhann vonast að þessi meiðsli heyri fortíðinni til og að hann verði góður núna. „Við höfum gert mikið af æfingum sem eiga að hjálpa að styrkja allan líkamann þar sem það eru fullt af litlum hlutum sem hafa hrjáð mig. Vonandi mun þetta allt saman ganga upp núna.“

Að lokum segir Jóhann að hann vilji njóta þess að spila fótbolta. „Ég er 29 ára núna og verð 30 ára í október. Ég vil vera á vellinum eins mikið og ég get og njóta þess bara að spila í ensku deildinni, sem er besta deild heimsins fyrir mér. Ég vil bara fá að njóta þess í nokkur ár í viðbót.“