Ágúst Stefánsson, af stjórnendum N1 mótsins á Akureyri, ræddi við 433.is í kvöld varðandi samkomu sem er á dagskrá í kvöld fyrir iðkendur keppninnar.
433.is fékk ábendingu fyrr í kvöld þar sem greint var frá því að öllum strákum mótsins hafi verið boðið á svokallaða kvöldvöku í KA höllinni sem hefst klukkan 20:30. Rapparinn Herra Hnetusmjör sér um að hita upp.
Ágúst segir að þessi samkoma sé aðeins fyrir börn mótsins og verða engir fullorðnir á staðnum. Tæplega tvö þúsund krakkar gætu látið sjá sig að hans sögn.
Að sama skapi segir Ágúst að engar kvartanir hafi borist vegna samkomunnar og að farið sé eftir öllum reglum í samstarfi með yfirvöldum og landlæknum.
,,Já það er rétt en það verða engir fullorðnir á svæðinu. Við erum búin að vinna þetta algjörlega með yfirvöldum og landlæknar voru með í þessu til að athuga hvort allt væri í standi og þetta er allt innan reglna yfirvalda að það sé enginn fullorðinn,“ sagði Ágúst við 433.is.
,,Það er 100 prósent verið að fara eftir öllum öryggisreglum í samstarfi við landlækni. Í heildina eru þetta 1,940 strákar á mótinu í heildina en hvort þeir mæti allir í kvöld er spurning. Þetta gætu mest orðið 1,940 strákar í kvöld.“
,,Við höfum aðallega fengið kvartanir yfir því að fólk fái ekki að vera með á skemmtuninni en það er enginn sem setur út á að þeir séu að hittast þarna strákarnir.“
N1 mótið er knattspyrnumót fyrir yngri stráka og er á dagskrá 1. til 4. júlí.