Heimir Guðjónsson, þjálfari Vals, var súr á svip í viðtali við Stöð 2 Sport í kvöld eftir leik við ÍA á heimavelli.
ÍA mætti svo sannarlega til leiks á Hlíðarenda og vann að lokum með fjórum mörkum gegn einu.
Valsmenn fengu færi til að skora í leiknum en færanýtingin var einfaldlega ekki nógu góð.
,,Það er þannig í þessum leik að það þarf að vera ákveðin grunnvinna til staðar þegar þú ferð í leik og hún var ekki til staðar,“ sagði Heimir við Stöð 2 Sport.
,,Við gáfum klaufalegt mark í byrjun og réðum illa við fríska menn hjá Skaganum og eftir fyrsta markið varð þetta verra, verra og verra.“
,,Mér fannst við reyna í seinni hálfleik en það var ekki nógu gott. Hins vegar viðurkenni ég það að ég man ekki eftir að hafa stjórnað liði sem fékk eins mikið af góðum möguleikum í einum leik. Þú vinnur hins vegar ekki leik með því að fá á þig fjögur mörk.“