Þetta kemur fram í nýrri bók sem gefin var út um leikmanninn, Our Gazza: The Untold Tales, en DailyMail fjallaði um málið. Gascoigne var að bíða eftir því að fara með liðsfélögum sínum í Middlesbrough til Birmingham að spila við Aston Villa. Liðið átti að ferðast um í glænýrri rútu en Gascoigne tók eftir því að lyklarnir voru í bílnum. Hann ákvað því að taka smá rúnt með sjálfum sér á rútunni áður en lagt var í hann.
Gasciogne var þekktur fyrir að vera brandarakall á ferlinum en hann ætlaði að taka rútuna á næsta veðmálastand. „Það var alltaf hættulegt þegar Gascoigne leiddist,“ sagði Bryan Robson, þjálfari Middlesbrough, í bókinni. „Þetta var glæný rúta, hann gat ekki staðist þessa „nýju“ lykt. Hann ætlaði að keyra á næsta veðmálastand til að veðja á nokkra leiki. En hann komst ekki út af æfingasvæðinu.“
Rútan fór víst beinustu leið á stóran stein. „Þegar hann kom skömmustulegur til mín eftir atvikið sagði ég honum að hann væri að fara að borga fyrir skemmdirnar. Ég vissi að það væri einhver áhætta að hafa hann í liðinu en ég efast um að margir stjórar hafa þurft að refsa leikmönnum fyrir að skemma rútu liðsins.“
