Óskar Hrafn Þorvaldsson, þjálfari Breiðabliks, segir að hans menn hafi verið þreyttir í 3-1 tapi gegn KR í kvöld.
Blikar voru að tapa sínum fyrsta deildarleik í sumar en liðið var ekki upp á sitt besta á KR-velli.
Óskar segir að leikjaálag liðsins sé mögulega farið að segja til sín.
,,Það má segja það að við höfum ekki verið tilbúnir. Við vorum ólíkir okkur í fyrri hálfleik og gerðum okkur erfitt fyrir með byrjuninni,“ sagði Óskar við Stöð 2 Sport.
,,KR eru frábærir og það er mikið talað um að þeir megi ekki komast yfir. Þeir spiluðu vel en við virkuðum þreyttir, þungir, orkulausir og stressaðir.“
,,Kannski er leikjaálag undanfarna vikna farið að kicka inn í þessum leik en við hefðum getað jafnað í seinni hálfleik ef því er að skipta. Fyrri hálfleikur var með því daprasta sem við höfum sýnt.“
,,Ég ætla ekki að dæma um leikjaálagið. Sum lið fá þrjá leiki á sjö dögum og önnur spila einn leik. Auðvitað hjálpar það, það er mikið álag á þessu liði en við afsökum það ekki.“