Fafa Picault, leikmaður FC Dallas, hefur opnað sig um erfiða tíma er hann var á mála hjá Cagliari á Ítalíu.
Picault er upprunarlega frá Haítí en hann var efnilegur leikmaður og var fenginn til Cagliari á unglingsárunum.
Þar þurfti Picault að upplifa viðbjóðslegan rasisma frá þjálfara varaliðsins sem kallaði hann reglulega ljótum rasískum nöfnum.
,,Það eru mismunandi tegundir af rasisma. Ég hef þurft að upplifa það í búningsklefanum og á vellinum,“ sagði Picault.
,,Þegar ég fór til Ítalíu var ég um 16 ára gamall og byrjaði að æfa með aðalliðinu ári seinna. Ég var eins og aðrir og æfði með aðalliðinu og spilaði með varaliðinu.“
,,Þjálfarinn í varaliðinu á þessum tíma er líklega ein versta manneskja sem ég hef hitt. Daglega þá þurfti ég að taka því að hann kallaði mig apa eða sagði mér að fara aftur í frumskóginn í Afríku.“
,,Hann sagði að svartir leikmenn væru ekki tæknilega góðir, að ég væri bara fljótur, að ég væri hérna til að hlaupa.“