Cesc Fabregas, fyrrum leikmaður Chelsea, sagði skemmtilega sögu í gær er hann ræddi við BBC Sport.
Fabregas rifjaði upp leik frá árinu 2017 þegar Chelsea spilaði við West Bromwich Albion í efstu deild.
Fabregas var á varamannabekknum í leiknum en Antonio Conte var stjóri Chelsea á þessum tíma.
Diego Costa, leikmaður Chelsea, öskraði á Conte á 70. mínútu og heimtaði að hann myndi setja spænska miðjumanninn inná.
,,Við spiluðum við West Brom. Þetta var týpískur leikur og eftir 70 mínútur þá var staðan markalaus. Þeir vörðust vel,“ sagði Fabregas.
,,Leikurinn kallaði eftir einhverjum eins og mér til að koma inná og opna vörnina en mínúturnar liðu og ekkert gerðist.“
,,Þá man ég eftir að Diego Costa kom að hliðarlínunni og öskraði á Conte: ‘Settu Cesc inná!’
,,Conte er ekki þjálfari sem þú vilt vera með vesen við og hann þóttist ekki hlusta á Costa. Tveimur mínútum síðar kallar hann á mig og ég lagði upp mark á Costa sem skoraði.“