Lúðvík Jónasson fyrrum varnarmaður í Stjörnunni er gestur í Dr. Football hlaðvarpsþætti Hjörvars Hafliðasonar og fer yfir liðið sitt, Stjörnuna. Þessi fyrrum knattspyrnumaður er í dag umsvifamikill í auglýsingabransanum á Íslandi.
Lúðvík er þekktur fyrir að liggja ekki á skoðunum sínum og hann segir aðeins 2-3 lið geta unnið Pepsi Max-deild karla í sumar. Hann segir alltof mikið látið með Víking Reykjavík.
„Ég er ekki alveg sammála þessum sex liðum, það er búið að hypea þessa Víkinga í drasl. Ég hef enga trú á þeim, það verður fróðlegt að sjá þessa ungu stráka. Þar eru lykilmenn eins og Sölvi og Kári sem eru að verða fertugir, ég sé ekki að þeir þoli leikjaálagið. Það verður álag á Arnari að finna út úr því. Víkingur er fjögur til sjö, flottir ef þeir ná ofar,“ sagði Lúðvík en margir spá því að Víkingur geti barist um sigur í Pepsi Max-deildinni.
Talað er um að sex lið geti barist á toppi deildarinnar en Lúðvík segir það ekki vera rétt. „Þetta eru nokkur lið, það eru ekkert öll sex. Það eru 2-3 lið sem geta unnið þetta mót. Fimleikafélagið getur gleymt því, Blika sulturnar geta gleymt því, unglingaklúbburinn í Víkinni getur gleymt því.“
Það sem vakti hvað mesta athygli í þættinum er að Lúðvík talar um Garðabæ sem Mónakó. ,,Þetta er Mónakó (Stjarnan) veldið, Meistaravellir (KR) og Íþróttafélag Borgarsjóðs (Valur),“ sagði Lúðvík um þau lið sem geta orðið Íslandsmeistarar.