Fylkir reynir að fá Geoffrey Castillion, framherjann öfluga aftur í sínar raðir. Þetta staðfestir Hrafnkell Helgason formaður meistaraflokksráðs Fylkis við 433.is.
Framherjinn öflugi frá Hollandi var öflugur með Fylki á síðasta ári en hann samdi við Persib Bandung í Indónesíu í vetur. Deildin þar er í pásu og framherjinn vill snúa aftur til Íslands.
,,Við erum að reyna að fá hann á láni, við erum vongóðir að fá hann í smá tíma,“ sagði Hrafnkell í dag.
Castillion hefur mikinn áhuga á að koma aftur til landsins en hann hefur spilað með Víkingi, FH og Fylki hér heima. „Hann hefur haft áhuga á að koma aftur, honum leið vel hjá okkur. Deildin í Indónesíu er í pásu og vill koma og spila fótbolta.“
Framherjinn er staðsettur í heimalandi sínu, Hollandi og ætti því ekki að vera í vandræðum með að ferðast til landsins. Hann skoraði 10 mörk í 19 deildarleikjum fyrir Fylki á síðasta ári.