„Það eru 30 búnir að senda mér þessa mynd á 10 mínútum! Þetta er galið,“ segir Berglind Björg Þorvaldsdóttir, leikmaður Breiðabliks, og vísar til myndbirtingar af henni sjálfri með frétt Vísis í dag þar sem fjallað var um smit innan Breiðabliks.
Fyrir breytingu var þessi mynd með fréttinni:
„Ég veit að fréttin er ekki um mig en þegar fólk sér myndina og fyrirsögnina þá tengir það mig við Covid, það er enginn að pæla í fréttinni sjálfri“ segir Berglind sem hafði samband við viðkomandi fréttamann og bað um að myndin af sér yrði fjarlægð.
Á upplýsingafundi almannavarna í dag hvatti Alma Möller landlæknir sérstaklega til nærgætinnar umræðu um þá sem smitast og þá sem verða fyrir því að smita aðra.
Að öllum líkindum var Alma að vísa til nafn- og myndbirtingar fyrir helgi af annarri knattspyrnukonu í Breiðabliki, sem smitaðist í Bandaríkjunum, þegar hún sagði: „Undanfarna daga hafa einstaklingar verið nafngreindir. Fyrir utan að vera ótækt vegna persónuverndarsjónarmiða þá skapaði þetta aukið álag á smitrakningarteymið.“ Sagði hún umræðu um smitaða einstaklinga ekki áður verið með þessum hætti og væri þetta á engan hátt við hæfi.
Berglind sagði myndbirtinguna og nafnbirtinguna á liðsfélaga sínum „gjörsamlega galna“. Berglind og allir í liðinu eru orðlaus yfir þessu. „Það er fáránlegt að gera hana að einhverjum blóraböggli. Hún gerði ekkert rangt og fór eftir öllum fyrirmælum. Það að hún hafi hringt sjálf og beðið um sýnatöku er náttúrulega bara frábært. Við í Breiðablik verðum til staðar fyrir hana og sýnum henni mikinn stuðning.“
Berglind segir liðsfélögum sínum ekki líða vel yfir þessu máli. „Það er stór mynd af henni með hverri einustu frétt. Það mun taka tíma fyrir hana að jafna sig á þessu. Svo er þetta núna á frekar viðkvæmu stigi og allt í einu kemur mynd af mér.“