Stjarnan staðfesti í gærkvöldi að einn leikmaður liðsins í meistaraflokki karla hefði greinst með veiruna. Smitið er rakið til útskriftarveislu sem fram fór á síðasta laugardag en samkvæmt heimildum var um að ræða fjölmenna veislu.
Umræddur leikmaður mætti á æfingu Stjörnunnar á fimmtudag en smitrakningarteymi Almannavarna hóf að rekja smitið nú klukkan 10:00. Þetta staðfesti Víðir Reynisson í samtali við 433.is.
Smitið var staðfest seint í gærkvöldi og voru allir leikmenn í meistaraflokki karla sendir í sóttkví á meðan smitið verður rakið. Ekki er öruggt að allir leikmenn liðsins verði í tveggja vikna sóttkví samkvæmt Víði, úr því verður skorið í dag eftir samtal við hinn smitaða leikmann.
Íslenskur knattspyrnuheimur er uggandi vegna stöðunnar en fyrr í vikunni greindist leikmaður kvennaliðs Breiðabliks með veiruna. Umræddur leikmaður var staddur í sömu útskriftarveislu og leikmaður Stjörnunnar.
Fjöldi fólks er farið í sóttkví eftir staðfestingu á þessum smitum og bætist stór hópur við í dag eftir smitið sem Stjarnan staðfesti í gærkvöldi.