Tilraun Fykis til að fá Geoffrey Castillion framherjann knáa aftur til félagsins gengur ekki upp. Félagið fær enginn svör frá knattspyrnusambandinu í Indónesíu.

Framherjinn öflugi frá Hollandi var öflugur með Fylki á síðasta ári en hann samdi við Persib Bandung í Indónesíu í vetur. Deildin þar er í pásu og framherjinn vildi snúa aftur til Íslands.

Castillion hafði áður spilað með Víkingi og FH hér á landi og hefði styrkt lið Fylkis mikið.

„Það varð niðurstaðan að hann er ekki að koma, liðið hans úti fékk ekki staðfestingu frá knattspyrnusambandinu í Indónesíu. Þeir gátu ekki lánað hann eða látið hann fara,“ sagði Hrafnkell Helgason formaður meistaraflokksráðs Fylkis við 433.is

Hrafnkell hefur sjálfur reynt að ná á starfsmenn sambandsins en án árangurs. „Það er ekki hægt að fá nein svör, ég er sjálfur búinn að fá tölvupóst hjá tíu starfsmönnum sambandsins og hef ítrekað sent á þá, það koma enginn svör. Ætli maður verði ekki bara að vera þakklátur fyrir hvernig hlutirnir eru hjá KSÍ.“

Fylkir ætlar að skoða hvort annar framherji sé í boði. „Við erum að skoða hvort það sé eitthvað annað í boði, við erum ekkert búnir að útiloka það.“

Fylkir er eitt af tveimur liðum í efstu deild karla á Íslandi sem er án stiga eftir tvær umferðir.