Pepsi Max-deild karla hefst laugardaginn 13 júní með leik Vals og KR á Hlíðarenda. Umferðin heldur svo áfram á sunnudag og mánudag. Þetta var staðfest í gær
KSÍ hefur sett mótið upp og verður síðasta umferðin spiluð 31 október. Tveir leikir fara fram á grasi en fjórir á gervigrasi í síðustu umferðinni.
Pepsi Max-deild karla átti að hefjast 22 apríl en hefur verið frestað vegna kórónuveirunnar. Félögin hófu æfingar í vikunni og Arnar Gunnlaugsson, þjálfari Víkings segir ástand leikmanna ekki eins gott og það var fyrir veiruna.
„Við tókum fitnesstest áðan og menn eru alveg 10, 15, 20% undir því sem þeir voru áður en Covid-19 kom, fyrir sjö, átta vikum. Þannig að það verður að sýna smá þolinmæði fyrstu tvo, þrjá leikina að menn séu aðeins lengi að komast í gagn. Það er af eðlilegum ástæðum,“ sagði Arnar á Rás2 í gær.
„Þú getur hlaupið í tvo daga samfleytt, hlaupa beint og þess háttar, og reynt að gera eins vel og hægt er í þeim efnum. En fótbolti, og aðrar íþróttagreinar, snýst svo mikið um litlu hreyfingarnar, litlu hliðarhreyfingarnar sem reyna á litlu vöðvana sem enginn veit hvað heita. Um leið og þú kemst í ákveðinn bolta… við reyndum að byrja rólega í þessari viku en strax eftir fyrstu tvær æfingarnar fóru menn að kveinka sér. Þetta er bara eðlilegt. Það tekur bara tíma fyrir líkamann að komast í gang aftur.“