Johan Adamsson yfirmaður markaðsmála hjá Puma segist afar spenntur fyrir komandi samstarfi við KSÍ en greint var frá sex ára samningi Puma við KSÍ í vikunni.
Íslenska landsliðið hefur um langt skeið leikið í búningum frá Errea. „Við erum hrikalega spennt fyrir þessu samstarfi við KSÍ,“ sagði Adamsson þegar blaðamaður ræddi við hann í dag.
Johan segir að Puma hafi hrifist af uppgangi íslenska landsliðsins síðustu ár og að gildi liðsins innan vallar séu góð. „Það er góður liðsandi og viðhorf leikmanna er fyrsta flokks, liðið skilur allt eftir á vellinum og vilja berjast á stærsta sviðinu. Stuðningur íslenskra stuðningsmanna er magnaður og við erum spennt að sjá hvað landslið Íslands gera innan vallar.“
Hjá Puma er sú trú að íslenska landsliðið muni áfram fara inn á stórmót og gera vel. „Við trúum á það og að sambandið sem heild nái árangri. Þrátt fyrir fáa íbúa þá hefur Íslands marga hæfileikaríka leikmenn. Við erum spenntir fyrir því að sjá hvað liðið gerir. Við ætlum að styðja liðið innan sem utan vllar.“
„Við erum ánægð með að hafa gert langtímasamning við KSÍ. Við höfum sömu gildi og ástríðu, við elskum leikinn og viljum ná árangri á meðal þeirra bestu.“
Íslenskir stuðningsmenn eiga von á góðu í samstarfinu við Puma. „Ég get staðfest að við verðum með meiri varning en bara treyjurnar. Við erum mjög spennt að frumsýna allt það sem verður í boði.“