Gylfi Þór Sigurðsson og félagar hans í Everton hafa hafið æfingar á nýjan leik eftir útgöngubann í Bretlandi. Gylfi og félagar voru heima hjá sér í átta vikur.

Gylfi hefur spilað aðra stöðu en hann er vanur eftir að Carlo Ancelotti tók við Everton, hann er á miðri miðjunni í 4-4-2 leikkerfi.

,,Ég hef spilað í þessu kerfi með íslenska landsliðinu, það er öðruvísi en þetta er ekki mín náttúrulega staða,“ sagði Gylfi.

„Ég hef spilað flesta leiki og hef vanist því að spila þarna undir stjórn Ancelotti. Ég fæ ekki að fara eins mikið fram á við og áður, ég nýt þess að spila þarna.“

Engir áhorfendur verða í ensku úrvalsdeildinni þegar hún fer aftur af stað. „Það hefur gríðarleg áhrif, stuðningsmenn búa til stemmingu og koma með ástríðu. Leikmenn fá kraft frá þeim, maður hugsar auðvitað út í það hvernig það verður að fagna marki.“

Í átta vikur hefur Gylfi verið heima hjá sér og mátt fara út einu sinni á dag. „Það er ræktin og hlaup á golfvelli sem hefur verið á dagskrá minni í átta vikur. Það hefur hreinsað hugann að eyða tíma með fjölskyldunni og hugsa um aðra hluti. Við erum spenntir fyrir því að fara af stað aftur.“