Óvissa er með framtíð Levski Sofia þar sem Hólmar Örn Eyjólfsson leikur en eigandi félagsins flúði land. Vasil Bojkov er sakaður skipulagða glæpastarfsemi, fjárkúgun, hótanir, skattsvik og tilraun til að múta opinberum aðila. Morgunblaðið fjallar um.
Bojkov er einn ríkasti maður Búlgaríu en nú rambar Levski á barmi gjaldþrots og óvissa er um framtíðina.
Stuðningsmenn Levski hafa hins vegar bjargað félaginu síðustu mánuði á meðan Bojkov dvelur í Mið-Austurlöndum.
„Stuðningsmennirnir hafa staðið fyrir alls konar söfnunum, keypt miða á „sýndarleiki“ sem fóru ekki fram vegna kórónuveirunnar, og maður er búinn að heyra ítrekað á undanförnum mánuðum að í næstu viku verði félagið gjaldþrota. En stuðningsmennirnir ná alltaf að safna saman nægilega miklum peningum til að halda þessu gangandi, sem er hreint með ólíkindum,“ sagði Hólmar vð Morgunblaðið.
„Það verður bara að koma í ljós þegar nýir eigendur taka við hvernig þeir vilja standa að framhaldinu hjá félaginu. Það gætu vel orðið miklar breytingar á rekstrinum þannig að óvissan er mikil sem stendur.“
Yfirvöld í Búlgaríu reyna að fá Bojkov heim en hann er sagður stór maður í undirheimum Búlgaríu.