Það vakti mikla athygli síðasta haust þegar Ágúst Gylfason var rekinn úr starfi sem þjálfari Breiðabliks í Pepsi Max-deild karla. Ágúst hafði náð góðum árangri en Blikar vildu meira.
Óskar Hrafn Þorvaldsson tók starfið en hann hafði komið Gróttu upp í Pepsi Max-deildina, magnaður árangur. Ágúst tók svo við starfi Óskars hjá Grótttu að lokum.
Ágúst ræðir málið við Fótbolta.net og hann telur að Breiðablik verði Íslandsmeistari í sumar enda sé Óskar besti þjálfari landsins. „Blikar eru best mannaðir. Þeir hafa marga unga leikmenn en líka eldri, þetta er frábær blanda. Þeir eru með besta þjálfarann á landinu og þetta ætti ekki að geta klikkað að mínu viti,“ sagði Ágúst við Fótbolta.net.
Óskar var kjörinn þjálfari ársins 2019 af samtökum íþróttafréttamanna og Ágúst segir hann þann besta í bransanum. „Er það ekki? Jú hann er besti þjálfari landsins samkvæmt 2019. Hann gerði frábæra hluti með Gróttu og það verður ekki tekið af honum. Hann var kosinn besti þjálfarinn og með þetta lið í höndunum þá er það mín sannfæring að þeir muni standa uppi sem Íslandsmeistarar. Enda þekki ég allt í Kópavoginum, bæði leikmenn og metnaðinn þar,“ segir Ágúst.