Logi Ólafsson, fyrrum þjálfari var í frábæru spjalli við Jóhann Skúla í Draumaliðinu þar sem hann gerir upp feril sinn sem hefur verið einstakur. Ekki skal útiloka að Logi þjálfi á nýjan leik.

Logi hefur átt langan og farsælan feril en árið 1997 var hann þjálfari ÍA, hann ákvað að taka fyrrum framherja félagsins Mihajlo Bibercic aftur á Akranes.

Bibercic hafði gert það gott á Íslandi en var kominn yfir sín bestu ár þegar hann mætti aftur til Íslands með bumbuna út í loftið.

„Það voru menn sem ég þurfti að senda heim, það var einn þar sem ég taldi mig vera að gera rosalega góða hluti með að fá. Það var með ÍA árið 1997 þegar Mihajlo Bibercic. Hann var í Stjörnunni og talar íslensku. Ég fæ hann og við semjum við hann,“ sagði Logi við Jóhann Skúla en Bibercic var oftar enn ekki kallaður Bibbi.

Bibercic var hins vegar alltaf að fresta því að mæta til Íslands og þegar hann mætti var hann fljótur að flýja aftur.

„Svo er hann alltaf að fresta ferðinni heim, ég sagði að við yrðum að fá manninn. Hann kemur og er ekki í nokkru standi, ég fer að láta hann æfa þrisvar á dag. Einn daginn var hann svo bara farinn, svona lagað rústar öllum plönum. Verið að fresta því að koma, mótið nálgast og þú átt engan séns.“