Ólgan í Garðabæ heldur áfram en Sigurður Bjarnason hefur ákveðið að láta af störfum sem formaður aðalstjórnar. Vísir.is segir frá.
Vísir.is sagði frá því á dögunum að varaformaður Stjörnunnar og fleiri stjórnarmeðlimir hafi hætt vegna átaka við Sigurð Bjarnason, formann félagsins. Allt voru það konur sem létu af störfum.
„Síðan segja þessar konur að þetta gengur ekki og að við séum ekki að fara vinna þetta svona, að svona hroki og yfirgangur er ekki í boði og þetta þarf að vera betra. Þá byrjar bara typpa félagið að segja „þið þurfið að fara út úr félaginu“. Þetta er bara það sem snýr að mér. Þetta er ekki það sem Stjarnan á að standa fyrir og fyrir mér er félagið búið að tapa gildum sínum,“ sagði Máni Pétursson, Stjörnumaður og útvarpsmaður um málið á dögunum.
Ljóst er að átökin hafa verið mikil og Sigurður ætlar að ganga frá borði. „Það er ekki nóg með að allt þetta mál hefur skaðað okkur gríðarlega, hvað varðar ímyndina út á við, og það að einhver nafnlaus aðili tjái sig og gefi upplýsingar um innanbúðarmál hjá Stjörnunni sem skaða félagið… það er einhver aðili sem er ekki að vinna af heilindum fyrir félagið. Ég er grjótharður Stjörnumaður, alinn upp hérna í félaginu, og geri ekkert nema það sem er til hagsbóta fyrir félagið og fyrir allar deildir. Sum mál þarf bara að leiða til lykta og þau eru leidd til lykta á ákveðinn hátt, út frá ákveðnum hagsmunum, og þannig störfum við hérna hjá Stjörnunni. Ég hef ekki verið að skella neinum hurðum,“ sagði Sigurður við Vísir.is.
Fjöldi fyrrum leikmanna Stjörnunnar í kvennaknattspyrnu hafa látið óánægju sína í ljós. Aðeins einn leikmaður úr Íslandsmeistaraliði frá 2016 er hjá félaginu.. „Það eitt ætti að vekja upp spurningar og efasemdir um stjórnarhætti og þau gildi sem félagið hefur tileinkað sér.“