Það vakti mikla athygli á föstudag þegar Bergsveinn Ólafsson, fyrirliði Fjölnis lagði skóna á hilluna nokkrum vikum fyrir mót.
Bergsveinn sagði frá því að ástríða hans fyrir fótboltanum væri ekki lengur til staðar, hann vildi því hætta frekar en að vera áfram með hangandi haus. Fimm vikur eru í að Pepsi Max-deildin fari af stað og ljóst að ákvörðunin kemur sér illa fyrir uppeldisfélag hans.
Málið var krufið í Dr. Football og Kristján Óli Sigurðsson lagði orð í belg. „Honum var ekki haggað, þessum leiðtoga sem ég verð að setja í þykkustu gæsalappir sögunnar. Leiðtogar hoppa ekki frá borði fimm mínútum fyrir Íslandsmót. Einn launahæsti leikmaður liðsins, búinn að taka laun þarna frá því í október og fram í apríl. Þetta er diss á liðsfélaga, þjálfara og félagið í heild. Ef ég væri liðsfélagi hans þá væri ég búinn að eyða honum úr símaskránni,“ sagði Kristján Óli og var ekki ánægður með ákvörðun Bergsveins.
Mikael Nikulásson, sagðist skilja ákvörðun Bergsveins. Hann hafi engan áhuga á fótbolta. „Vont fyrir liðið og þjálfarann, hann nennir þessu ekki. Ég ætla ekkert að vera eitthvað að dissa hann fyrir það. Mér finnst þetta eðlileg ákvörðun, eina sem ég set út á ef hann er búinn að taka laun frá október og fram í apríl. Þá á hann að endurgreiða þann pening, hann á ekki að fá nein laun. Hann á að endurgreiða. Ég hef haft þetta á tilfinningu eftir að hann fór að gefa eftir hjá FH, að hann hafi ekkert sérstakan áhuga á fótbolta. Hann hefur dalað mikið.“
,,Þetta er eins og önnur vinna, hann nennir þessu ekki. Þá hættir þú, þetta eru ekki leiðtogahæfileikar að labba í burtu.“
Athygli hefur vakið að Bergsveinn hætti á þessum tímapunkti. „Hann segist vera búinn að hugsa þetta lengi, hann hefði getað farið út með reisn eftir síðasta tímabil. Hann hefði líka getað farið þegar allt fór í lás í mars, þeir hefðu haft meiri tíma til að fylla skarðið,“ sagði Kristján Óli.
Bergsveinn hefur útskýrt ákvörðun sína og segir hana hafa verið afar erfiða. „Það var fyrirsögn á Vísi að hann væri leiðtogi en ekki fótboltamaður. Hann hefði getað notað það í haust ef hann hefði hætt í haust. Hann fer út fimm mínútum fyrir mót, þetta er lélegt og aumingjaskapur.“
Bergsveinn hefur mikinn áhuga á sálfræði og hefur gefð af sér gott orð sem fyrirlesari. „Ef ég væri stjórnandi í fyrirtæki sem ætti að fá peppara á starfsdag hjá mér, þetta nafn kemur upp. Bergsveinn Ólafsson, ´Já er það auminginn sem hoppaði frá borði fimm mínútum fyrir mót´. Nei takk, ég ætla að fá einhvern annan,“ sagði Kristján að lokum.
