Jóhann Berg Guðmundsson, landsliðsmaður í knattspyrnu og leikmaður Burnley hefur upplifað erfiða tíma síðasta árið. Jóhann hefur glímt við mikið af meiðslum.
Jóhann meiddist á læri gegn Frakklandi í október og hefur síðan þá ekki fundið taktinn, lærið gaf sig aftur í janúar og í febrúar meiddist hann á kálfa.
,,Ég fór framhjá leikmanni og hann ýtti við mér, öll þyngdin fór á vinstra lærið og það gaf sig. Ég vissi að þetta væri alvarlegt,“ sagði Jóhann Berg við The Athletic.
Jóhann snéri aftur á völlinn um jólin þegar álagið var mikið, margir leikir og mikið af æfingum. Lærið gaf sig svo aftur í upphafi árs í enska bikarnum.
,,Það var líklega ekki það besta fyrir mig að koma aftur þegar það er svona þétt spilað og margar æfingar. Ég fann aftur tak í lærinu í bikarnum, það var erfitt að taka því. Ég hafði lagt svo mikið á mig til að koma til baka.“
,,Andlega, hef ég líklega aldrei farið jafn langt niður. Fyrstu dagana sérstaklega, ég var mjög niðurlútur. Þú ferð að hugsa um þetta og af hverju þetta sé að gerast. Þú reynir svo að koma þér af stað og koma sterkari til baka.“