,,Ég mætti og spilaði leik fyrir Selfoss án þess að hafa sofið,“ sagði Ingólfur Þórarinsson, oft kallaður Ingó Veðurguð þegar hann ræddi fótboltaferil sinn við hlaðvarpsþáttinn, Fantasy Gandálf.
Ingólfur var öflugur leikmaður en tónlistin tók fljótt yfir, hann reyndi þó að halda áfram í fótbolta en það með misgóðum árangri. Oft illa sofinn eftir brölt næturinnar, með gítarinn. Hann lék með uppeldisfélagi sínu á Selfossi en einnig með Fram og Víkingi í höfuðborginni.
Ingó rifjar upp sögu þar sem hann tók að sér tónleika, hann taldi að það væri stutt leið að fara til skemmta fólkinu sem bókaði hann.
,,Ég bókaði gigg á Freysnesi, ég hélt að þetta væri bara Grímsnes, Freysnes, Öndverðarnes. Þetta væri allt þarna, við vorum bara alltaf að spila rétt fyrir utan Selfoss. Þetta var aðeins betri greiðsla en fyrir gigg í Grímsnesi.“
,,Við tókum það, svo bara keyrt af stað. Góðir átta tímar fram og til baka, þetta er ekki alveg á Höfn í Hornafirði en ekki langt þar frá.“
Eftir næturbröltið fór Ingólfur í leik með Selfossi en sá var á Húsavík.
,,Það var leikur við Völsung, flogið þangað. Ég rétt skreið í rútuna og upp í flug. Svona var allur fótboltaferilinn minn, það var allt planað í kringum einhver gigg.“
,,Maður átti hvergi heima, bjó bara í töskunni. Bjó hjá mömmu og leigði herbergi hjá félaga, þetta var voða gaman.“