Jón Þorgrímur Stefánsson, var í einkar áhugaverðu viðtali við Hafliða Breiðfjörð á Fótbolta.net á dögunum. Jón átti farsælan feril sem knattspyrnumaður hér á landi.

Árið 2000 var hann í herbúðum Vals en yfirgaf liðið áður en tímabilið hófst, að sögn Jóns var það eftir slagsmál í æfingaferð félagsins við þjálfarann, Ejub Purisevic.

„Morguninn eftir kemur Ejub, hann er mjög skapstór líka og in your face týpa. Hann rífur í mig þegar við erum að koma upp á hótelið og ég segi honum að sleppa mér. Hann tekur þá fastar í hálsmálið á mér og ég segi: ‘Gaur, slepptu mér!’ Hann sleppti ekki svo ég endaði á að snúa hann niður og segja honum að hann hefði betur sleppt mér,“ sagði Jón.

Þessu hafnar Ejub alfarið og segir Jón Þorgrím ljúga. „Þessar sögur sem Jón Þorgrímur sagði um mig í viðtalinu eru ósannar,“ sagði Ejub við Fótbolta.net í dag.

„Ef ég hefði sem þjálfari hjá félagi á borð við Val eða öðru félagi gert alvarlega hluti eins og þessa hefði það líklega haft mjög miklar afleiðingar fyrir mig.“