Óskar Hrafn Þorvaldsson, þjálfari Breiðabliks, var gestur í hlaðvarpsþættinum Fantasy Gandalf í dag.
Óskar fór þar yfir ýmis mál og meðal annars ákvörðun Gunnleifs Gunnleifssonar að stíga til hliðar sem aðalmarkvörður Blika.
Anton Ari Einarsson var fenginn til Blika á síðasta ári og verður markvörður númer eitt í sumar.
Það kom mörgum á óvart þegar Gunnleifur ákvað að stíga til hliðar en það var ekki ákvörðun Óskars.
,,Gulli var option. Gulli er farsælasti markvörður í íslenskri deildarkeppni síðan Guð má vita hvenær,“ sagði Óskar.
,,Það var sennilega Kristján Finnbogason sem gæti keppt við hann. Gulli var option og option lengi fram eftir vetri en svo setjast menn niður og það er ljóst að hann verður ekkert yngri og hann mat það þannig að þegar ferillinn er að fjara út, það sést í endann á honum þá þurfa menn að fara að huga að nýjum ferli.“
,,Samtalið þróaðist á þá vegu að það væri betra fyrir alla ef hann kæmi inn í þjálfarateymið og hjálpaði að styðja við Anton Ara. Anton Ari er 26 ára gamall og hann var ekki keyptur til að sitja á bekknum. Ég held að hann hafi verið brjálaður með það hjá Val.“
,,Gulli var option og þeir voru í samkeppni þar til Gulli ákveður að stíga til hliðar. Menn taka spjallið og svo finnur hann að það rétta er að styðja við bakið á Antoni og koma inn í þjálfunina.“