Ragnar Sigurðsson og aðrir leikmenn FCK í Danmörku hafa tekið á sig 20 prósenta launalækkun vegna kórónuveirunnar.
Félagið staðfesti þetta í dag en um er að ræða leikmenn, þjálfara og helstu starfsmenn félagsins.
Mörg íþróttafélög um allan heim berjast nú í bökkum við að halda sjó, engir leikir eru í gangi og minnka tekjur félaganna hratt.
Stærstu félög heims hafa einnig gripið til aðgerða og þannig tóku allir leikmenn Barcelona á sig 70 prósenta launalækkun.
Ragnar gekk í raðir FCK í upphafi árs og gerði samning við félagið fram á sumar en danska úrvalsdeildin ætlar sér að hefja leik aftur.