,,Ég veit ekki hvort ég geti sagt það hérna, það var fullt af ljótum hlutum. Hann náði að komast í mína fínustu,“ sagði Veigar Páll Gunnarsson, fyrrum leikmaður Stjörnunnar þegar hann rifjaði upp atvik frá árinu 2014 á Stöð2 Sport í gær.

Veigar var mættur í þáttinn, Sportið í kvöld á Stöð2 Sport og rifjaði upp leikinn þar sem Stjarnan varð Íslandsmeistari með 2-1 sigri á FH, árið 2014. Veigar var rekinn af vell í leiknum fyrir að slá Hólmar Örn Rúnarsson, hressilega utan undir. Hann vildi ekki gefa upp hvaða ljótu orð Hólmar lét falla.

,,Ég skammast mín fyrir þetta á mínum ferli, ef FH hefði unnið þennan leik þá hefði ég pottþétt flutt aftur til Noregs,“ sagði Veigar sem bjó lengi í Noregi þar sem hann var atvinnumaður.

Hann segir að honum hafi aldrei liðið jafn illa eins og þessum tímapunkti. ,,Ég er að segja þér það, mér hefur aldrei liðið jafn illa á ævinni. Maður hugsaði til Noregs aftur.“

,,Ég vissi nákvæmlega hvað ég gerði af mér, ég vissi að ég væri að fá rautt spjald,“ sagði Veigar en Starnan kláraði leikinn og vann sigur án hans.

Sportið í kvöld er á dagskrá á Stöð2 Sport þriðjudags, miðvikudags og fimmtudagskvöld klukkan 20:00

Öll helstu atvik úr þessum sögufræga leik má sjá hér að neðan.