Bergsveinn Ólafsson, varnarmaður í Fjölni skrifar pistil á Vísir.is þar sem hann ræðir um kórónuveiruna og áhrif hennar. Bergsveinn hefur haslað sér völl með fyrirlestra sína þar em hann reynir að auðvelda fólki leiðina í gegnum lífið.
,,Lífið okkar allra breyttist skyndilega. Kórónavírusinn kom flatt upp á mann því maður var svo óheyrilega bjartsýnn á að hann myndi ekki hafa áhrif á Ísland. Allt í einu bankaði hann á dyrnar og var byrjaður að borða mat úr ísskápnum okkar óumbeðinn. Ætli þetta sé ekki vondi eiginleikinn við bjartsýnina. Við höldum oft að það muni aldrei koma neitt fyrir okkur sjálf en svo gerast hlutir í lífinu þegar við eigum síst von á þeim,“ skrifar Bergsveinn í pistli sem birtist á Vísir.is í dag.
Bergsveinn segir eðlilegt að fólk finni fyrir kvíða vegna veirunnar. Hann veltir því fyrir sér hvað skal gera. ,,Við sitjum því uppi með ákveðinn kvíða eins og lífið er í dag hvort sem okkur líkar betur eða verr við það. Sem leiðir að næstu spurningu sem ég hef verið að spyrja mig síðustu daga: Hvernig eigum við að tækla kvíðann? Það er flókinn vandi og engin heilög lausn í boði en ég ætla deila með ykkur mínum pælingum.“
,,Við getum stjórnað hvernig við kjósum að lifa frá degi til dags. Augnablik fyrir augnablik. Eins og Viktor Frankl kenndi okkur, það er aldrei hægt að taka frá okkur hvernig við bregðumst við aðstæðum í lífinu. Þegar við getum ekki breytt þeim erum við knúin til að breyta okkur sjálfum. Við verðum því að breyta okkar viðhorfi gagnvart Kóróna.“
Þessi orð Bergsveins eiga svo vel við. ,,Því meira stress sem þú upplifir, því veikara ónæmiskerfi og því líklegra að þú fáir Kórónavírusinn. Hreyfðu þig. Taktu göngutúr eða farðu út að skokka. Sofðu 7 tíma að lágmarki,“ skrifar Bergsveinn.