,,Þetta var bara bíó, frá því að hann mætti og þangað til að hann fór,“ sagði Kristján Óli Sigurðsson, þegar hann ræddi um Prince Rajcomar í Draumaliðinu hjá Jóhanni Skúla í dag.
Prince Rajcomar, hollenskur framherji vakti mikla athygli á Íslandi þegar hann lék með KR og Breiðablik. Prince Linval Reuben Mathilda eins og hann heitir fullu nafni lék á Íslandi frá 2007 til 2009.
Prinsinn vakti athygli innan sem utan vallar, hann hafði gríðarlega hæfileika en virtist ekki alltaf nenna því að leggja sig fram. Hann ók um bæinn á hvítum Range Rover, hann lét breyta merkingunni á bílnum. Það stóð ekki bara Ranger Rover eins og venjulegum bílum heldur stóð Prince.
Samningurinn sem Prince fékk í Kópavoginum var í evrum og árið 2008 í bankahruninu hækkaði hann hressilega. ,,Hann mætir 2007, ég held að Breiðablik sé enn að leita að gæjanum sem skrifaði undir samninginn við hann. Þetta var alvöru góðæris samningur, ég get vottað fyrir það. Ég skrifaði undir bílalán og eitthvað fyrir hann.“
Prince var mikill vinur Kristjáns og Egils Einarssonar, Gillz. Einkaþjálfarinn var ekki alltaf sáttur með mataræðið hjá Prince. ,,Við vorum mjög nánir, það var verið að flakka með íbúðir hjá honum. Hann bjó oft niðri í bæ, hann svaf oft á sófanum hjá mér því hann nennti ekki þangað. Ég veit ekki hversu oft hann bað mig að hringja í Dominos Pizza, hann var að panta sér kjúklinganagga og kartöflubáta og 2 lítra Sprite með. Þetta var ótrúlegt.“
Prince ók um götur Reykjavikur á hvítum Range Rover og vakti gríðarlega athygli. ,,Hann fékk þvílíka athygli, hann var kominn á þennan Range Rover sem hann keypti af Gyllfa á Bílaútsölunni. Hann náði að selja Prince þann bíl, þetta var lygilegt,“ sagði Kristján.
Skömmu áður hafði Prince verið á Renault og þegar hann var að fara í frí heim til Hollands, þá ákvað hann að fljúga þeim bíl út með.
,,Hann fer út eftir tímabilið 2007 og ætlar að taka bílinn með sér, hringir í mig og segir að ég verði að sækja sig í Keflavík. Þá ætlaði hann að fljúga bílnum út, ég lét hann vita að það væri hægt að senda hann með skipi,“ sagði Kristján og hélt áfram.
,,Hann ætlaði að senda hann með cargo til Þýskalands, hann er latari en allt. Hann er að spara sér tíma, ég bíð eftir honum þar sem hann átti að losa bílinn. Þá var hann alveg að koma, hann ákvað að taka bensín á bílinn áður en hann færi í flugið til að þurfa ekki að byrja á þvi í Þýskalandi.“
,,Þeir spyrja hvort það sé ekki lítið bensín, hann segir að hann sé fullur. Þeir segja honum að gleyma þeirri hugmynd, bíllinn fari ekki fullur af bensíni í flugvél. Þá var bara eitt ráð í stöðunni, við keyrðum Sandgerðisveginn á alltof miklum hraða til að tæma tankinn sem fyrst. Bíllinn fór með vélinni út, kostaði hann 400 þúsund. Hann eyddi vel þessi bíll, það hefði enginn annar keypt þennan bíl.“
