Miðjumaðurinn Andri Fannar Baldursson spilaði í dag sinn fyrsta leik í Serie A, efstu deild Ítalíu.
Andri er aðeins 18 ára gamall en hann gekk í raðir Bologna í byrjun 2019 frá Breiðabliki.
Hann hefur hrifið marga með frammistöðu sinni hjá Bologna og kom inná gegn Udinese í dag.
Andri fékk nóg af mínútum í leiknum en hann kom við sögu á 59. mínútu og kláraði svo viðureignina.
Það var dramatík í boði en Bologna jafnaði metin á 94. mínútu til að tryggja eitt stig í 1-1 jafntefli.
Vonandi fáum við að sjá meira af Andra á næstu vikum enda um mjög efnilegan leikmann að ræða.