Andri Fannar Baldursson spilaði óvænt fyrir lið Bologna í dag sem mætti Udinese í Serie A.
Andri er aðeins 18 ára gamall en hann kom til félagsins frá Breiðabliki og þykir mjög mikið efni.
Miðjumaðurinn ræddi við heimasíðu Bologna eftir leik og viðurkennir að tækifærið hafi verið óvænt í 1-1 jafntefli.
,,Ég er mjög ánægður með fyrsta leikinn. Ég hef lagt mig fram í vikunni en bjóst ekki við að fá tækifæri ef ég á að vera hreinskilinn,“ sagði Andri.
,,Stjórinn sagði mér að fara út á völlinn og skemmta mér, ég reyndi að gera mitt besta og okkur tókst að skora gott jöfnunarmark.“
,,Ég er ánægður hér í Bologna, það er mikil ástríða fyrir fótboltanum á Íslandi og örugglega vegna þess að við erum víkingar og gefumst aldrei upp.“
,,Ef ég fæ kallið aftur þá verð ég tilbúinn og reyni að gera mitt besta fyrir liðið.“