Kolbeinn Sigþórsson, framherji AIK í Svíþjóð hefur ekki spilað neitt á undirbúningstímabilinu vegna meiðsla. Frá þessu er greint í dag. AIK hefur timabil sitt um helgina í bikarnum en framherjinn knái er ekki leikfær, fram kemur að hann hafi varla æft neitt.
,,Hann er ekki að æfa á fullu og getur því ekki spilað,“ sagði Rikard Norling, þjálfari AIK.
Kolbeinn meiddist í lok síðasta árs með landsliðinu, síðan var hann veikur í verkefni landsliðsins í janúar. Kolbeinn hefur svo ekkert spilað í fimm æfingaleikjum AIK í upphafi árs.
,,Hann getur ekki spilað, hann hefur ekkert spilað og varla æft neitt. Þetta hefur verið erfitt undirbúningstímabil fyrir hann.“
Kolbeinn kom til AIK fyrir ári síðan og átti ágætis spretti á fyrsta tímabilinu en honum er ætlað stórt hlutverk í ár.
Þessi tíðindi af Kolbeini eru ekki góð fyrir íslenska landsliðið, rúmur mánuður í mikilvægan landsleik gegn Rúmeníu og framherjinn sem Erik Hamren hefur lagt mikið traust á, er í kappi við tímann.