Það eru enn á ný læti í kringum Paul Pogba og Mino Raiola umboðsmann hans, þeir félagar gera nú allt til þess að tryggja að Pogba fari frá Manchester United í sumar. Miðjumaðurinn hefur viljað fara frá United í rúmt ár.
Pogba hefur spilað örfáa leiki á þessu tímabili en hann er frá vegna meiðsla, Raiola vill taka Pogba frá United í sumar en þangað kom hann árið 2016.
Sir Alex Ferguson, stjóri Manchester United þoldi ekki Raiola og hans vinnubrögð. Þeir rifust harkalega þegar Pogba fór ungur að árum frítt frá United til Juventus. ,,Þú getur ekki átt manneskju hvar sem er í heiminum. Ég vona að Solskjær sé ekki að gefa í skyn að Pogba sé fangi. Áður en Solskjær tjáir sig um það sem ég segi þá ætti hann að kynna sér samhengið betur,“ sagði Raiola í gær en áður hafði Ole Gunnar Solskjær sagt að Pogba væri í eigu Manchester United.
Bróðir Pogba, Mathias Pogba hefur verið duglegur að ræða málin við fjölmiðla á Spáni en Real Madrid er orðað við Pogba. Hann ákvað í dag að skella olíu á eldinn.
,,Það vita allir að Paul vill fara frá Manchester United, hann vill spila í Meistaradeildinni og vinna titla,“ sagði Mathias.
,,Við vitum öll að United er ekki að fara að keppa um titla, sjáum hvað gerist í sumar.“