Það vakti nokkra athygli í upphafi árs þegar Rostov, þá félag Ragnars Sigurðssonar sendi frá sér yfirlýsingu. Ástæða var fréttaflutningur í Rússlandi um mál Ragnars, sagt var að hann væri að glíma við áfengisvandamál.
Rostov steig hratt inn og sagði málið tóma þvælu, Ragnar sagði ekkert en hann gekk í raðir FCK á dögunum frá Rostov í Rússlandi.
Ragnar ræddi svo málið við danska fjölmiðla um helgina en Íslendingavaktin sagði fyrst frá. ,,Eins og þú hefur séð, þá steig Rostov fram með yfirlýsingu. Fjölmiðlar vissu ekkert hvað þeir voru að tala um, þeir ættu að halda kjafti. Þeir eiga ekki að skrifa bara eitthvað, þessu máli er lokið. Rostov drap söguna strax, ég þurfti ekkert að gera,“ sagði Ragnar við BT í Danmörku.
Meira:
Yfirlýsing: „Það eru lygar að halda því fram að Ragnar glími við áfengisvandamál“
Ragnar segir mikið um slúður í Rússlandi, hann gæti ekki hafa spilað svona lengi á meðal þeirra bestu ef hann væri alkhólisti. ,,Það er mikið slúðrað í Rússlandi eins og öðrum löndum, ég veit ekki hvað gekk á. Ég hugsa ekki mikið um þetta, það var meira vinir og fjölskylda sem létu þetta pirra sig.“
,,Ef ég léti þetta hafa áhrif á mig, yrði það bara verra. Ég hefði ekki spilað á þessu getustigi svona lengi, og staðið mig vel bæði með landsliði og félagsliði ef ég væri alkóhólisti. Þetta er tóm steypa.“
,,Ég veit ekki hvort þetta sé það versta sem ég hef upplifað frá fjölmiðlum, því mér er drullusama. Ég held mínu lífi áfram.“
