Knattspyrnuþjálfarinn Magnús Gylfason var gestur í útvarpsþættinum Bítið í morgun þar sem hann sagði frá ansi áhugaverðri sögu.
Magnús er nýkominn heim til Íslands eftir að hafa fagnað 60 ára afmæli bróður síns á skemmtiferðaskipi.
Corona-veiran gerði farþegum skipsins erfitt fyrir en ástandið í Asíu er slæmt þessa dagana eins og flestir vita.
Sem betur fer greindist ekkert smit á skipi Magnúsar sem tjáði sig um þessa ævintýralegu ferð í þættinum.
„Í grófum dráttum var þetta þannig að við fórum í lúxussiglingu, því bróðir minn var sextugur og flugum alla leið til Guam í Kyrrahafinu og ætluðum að vera þar um borð í sex daga, fimm nætur, á lúxusskipi og fara í land í Manilla. En út af þessari Corona-veiru þá voru Filippseyjar og Manilla búin að loka höfninni fyrir skemmtiferðaskip,“ sagði Magnús.
„Þá voru góð ráð dýr. Skipafélagið ákvað að sigla skipinu til Vietnam. En, á leiðinni þangað, þegar búið var að sigla í um sólarhring, þá kom upp sama staða þar. Þeir vildu ekki fá skip að landi, eða ekki okkar skip, veit ekki hvort það var lokað á öll skip, því það höfðu einhverjir komið um borð í skipið okkar farþegar sem höfðu farið í gegnum Hong Kong í Kína. Og það var nóg til að Víetnam vildi ekki hleypa okkur í land.“
Stefnan var síðar sett á Singapore en gestir skipsins óttuðust hvort þeim yrði hleypt í land þar sem nokkur smit höfðu komið upp þar.
Það reddaðist að lokum en eftirlitið í skipinu var gríðarlegt. Það þurfti að hitamæla farþega tvisvar á sag.
„Það var gríðarlega mikið eftirlit í skipinu. Við þurftum að hitamæla okkur tvisvar á dag: mæta og stimpla sig inn með kortinu sínu. Fara í hitamælingu fyrir hádegi og eftir hádegi alla daga eftir að þetta kom upp.“
,,Það reyndist sem betur fer ekkert smit í okkar skipi og aldrei nein vandamál. En það var þó þetta að það þurfti að margbóka flug þvers og kruss og óþægilegt meðan óvissan var en lúxusinn var mikill í skipinu og það reddaði þessu.“
Magnús bætir við að ferðin hafi þó verið skemmtileg þrátt fyrir að fólk hafi óttast hósta og klæðst grímum á leiðinni heim.
,,Ef einhver hóstaði þá fór um mannskapinn. Menn voru ekki með grímur en á leiðinni heim voru allir með grímur og hitamælingar.“
,,Þetta var sex stjörnu skip með rosalefa flottan aðbúnað. Skemmtiatriðin voru stanslaus og maturinn frábær. Þetta var alveg geggjað en ég var orðin ansi pirraður þar til ég sætti mig við stöðuna.“