Knattspyrnusamband Íslands þarf nú að fara að vinna landsliðsþjálfara karla og kvenna á næstu dögum. Óvíst er hvað tekur við en Jóni Þóri Haukssyni verður vikið úr starfi í dag eftir uppákomuna í síðustu viku.
Erik Hamren lét af störfum eftir að hafa mistekist að koma íslenska landsliðinu á Evrópumótið næsta sumar. Víðir Sigurðsson einn reyndasti fréttamaður landsins virðist hafa fundið lausn á málum.
Lars Lagerback er sterklega orðaður við karlaliðið eftir að hafa verið rekinn frá Noregi, Lars lét af störfum eftir fyrsta stórmót Íslands árið 2016. „Þegar málin voru rædd við eldhúsborðið heima lagði betri helmingurinn til að Lars yrði ráðinn aftur til KSÍ en núna sem þjálfari kvennalandsliðsins,“ skrifar Víðir í Morgunblaðið í dag.
„Ég fór með kvennalandsliðinu á EM 2013 í Svíþjóð þar sem Lars mætti óvænt á svæðið og fór að bera töskur, stilla upp keilum og aðstoða Sigga Ragga, þáverandi þjálfara, á æfingum.“
Víðir segir að í karlalandsliðinu vilji menn fá Lagerback aftur „heim“. „Reynsla og skipulag Svíans myndi svo sannarlega koma að notum á ný og heyrst hefur að „gamla gengið“ í karlaliðinu hafi þegar kallað eftir því að fá Lars aftur til Íslands.
Víðir leggur svo til að Lagerback taki við karla og kvennalandsliðinu með framtíðar landsliðsþjálfara með sér. „Því ekki að freista þess að ráða hann aftur til tveggja ára, nú sem yfirþjálfara beggja landsliðanna? Með framtíðarþjálfara beggja liða sér við hlið í tvö ár? Við höfum ágætisreynslu af slíku fyrirkomulagi,“ skrifar Víðir í Morgunblaðið.