Jón Þór Hauksson hefur lokið starfi sínu sem þjálfari kvennalandsliðs Íslands, þetta tilkynnti Knattspyrnusambandið í dag. Í tilkynningu KSÍ kemur fram að Jón Þór hafi sjálfur óskað eftir starfslokum en í gær hafði RÚV og Fótbolt.net sagt frá því að KSÍ hefði tekið ákvörðun um að reka Jón Þór úr starfi. Guðni Bergsson, formaður KSÍ segir þær fréttar rangar.
Þessi niðurstaða kemur í málið eftir atvik sem kom upp í Ungverjalandi í síðustu viku. Atvik kom upp í fögnuði liðsins í Ungverjalandi í síðustu viku. Þjálfarinn, starfsfólk KSÍ og leikmenn voru þá að sletta úr klaufunum eftir að stelpurnar höfðu tryggt sig inn á Evrópumótið í Englandi.
Jón Þór fór á fund með KSÍ í dag. Guðni Bergsson formaður KSÍ svaraði spurningum um málið þegar við heyrðum í honum í kvöld og svör hans eru hér að neðan.
Hvernig komust þið að þessari niðurstöðu?
Þetta kom í kjölfarið að ósk Jóns Þórs um að segja upp sínu starfi, við náðum samkomulagi um það. Það var niðurstaðan og lendingin.
Fréttirnar sem RÚV og Fótbolti.net birta um að þið (KSÍ) hafið verið búin að taka ákvörðun um að reka hann áður en þið hittust eru úr lausu lofti gripnar?
Já, já. Það var verið að vísa í stjórn sem hafði ekki komið saman, það voru ekki sannar og réttar fréttir
Eftir á það sem undan er gengið var þetta óumflýjanleg niðurstaða?
Ég veit ekki hvað skal segja um það, þetta var niðurstaðan. Auðvitað tók þetta mál á fyrir okkur öll, þetta var eitthvað sem að enginn óskaði sér. Þetta var niðurstaðan á endanum og við unnum þetta og kláruðum í dag að ósk þjálfarans, núna er það fyrir okkur að horfa fram á veginn. Horfa í leiðinni til þess og það má ekki gleymast að við tryggðum okkur inn á Evrópumótið og það er það sem eftir stendur, fyrir fráfarandi þjálfara og leikmenn.
Er ekki súrt að sitja með þetta mál ofan í þennan frábæra árangur? Að þetta sé í fréttum?
Auðvitað er það súrt, það er leiðinlegt. Það hefur tekið á en þetta er sú staða sem kom upp, við urðum að takast á við hana.
Kom pressa frá leikmönnum til forráðamanna sambandsins?
Alls ekki, þetta var ákvörðun sem snéri að Jóni Þóri og KSÍ og var tekinn á þeim grundvelli. Leikmenn komu ekki að því, höfðu ekkert um það að segja eða áhrif þar á.
