Aron Jóhannsson framherji Hammarby í Svíþjóð nýtti sér riftunarákvæði í samningi sínum við félagið og mun yfirgefa félagið á næstu dögum. Aron getur því samið við nýtt félag í janúar.
Aron sem er þrítugur átti frábært tímabil með Hammarby og skoraði tólf mörk í 22 leikjum eftir brösuga byrjun vegna meiðsla.
Aron stefnir á það að spila í sterkari deild en hann kom til Hammarby fyrir einu og hálfu ári eftir dvöl hjá Werder Bremen í Þýskalandi. „Ég veit ekki hvert ég mun fara en staðan er orðin þannig að ég mun fara í janúar og róa á ný mið. Ég fer inn í gluggann og bíð eftir einhverju spennandi,“ sagði Aron við Morgunblaðið .
Aron hafði áður spilað með AGF í Danmörku, AZ Alkmaar í Hollandi og Werder Bremen. „Það var kannski ekki planið en það var draumurinn; að taka eitt skref til baka til að taka tvö áfram. Ég var í þriðju sterkustu deild í heimi og ég veit að ég get spilað í sterkustu deildunum. Ég hef sannað það og ég hef líka sannað að ég get komið mér í leikform aftur og ég er búinn að spila fullt af leikjum, skora mörk og standa mig vel. Þetta eru spennandi tímar og ég hlakka til að sjá hvað gerist núna.“
Rúm fimm ár eru síðan að Aron lék síðast landsleik með Bandaríkjunum en hann á að baki 19 landsleiki fyrir þjóðina. Hann kaus að spila fyrir Bandaríkin frekar en Ísland. Gregg Berhalter þjálfari Bandaríkjanna hefur fylgst með uppgangi Arons síðustu mánuði. „Ég talaði við þjálfarann fyrir um það bil mánuði. Við áttum gott spjall um framtíðina og hvað er að gerast. Hann var ánægður með að ég væri kominn í gott leikform aftur. Hann veit hvað ég get og hann var spenntur fyrir mér. Hann talaði vel til mín og gaf það í skyn að ég fengi að sýna aftur hvað í mér býr með landsliðinu. Það var ánægjulegt fyrir mig að heyra að hann hefði áhuga á að hafa mig í hópnum,“ sagði Aron við Morgunblaðið.