Launin í ensku úrvalsdeildinni í fótbolta eru ansi góð fyrir flesta þá leikmenn sem þar spila, talsverður munur er þó á launum hjá liðum sem vilja vera í efri hluta deildarinnar og þeirra sem eru í neðri hlutanum.
Ísland á þrjá fulltrúa í ensku úrvalsdeildinni og samkvæmt enskum götublöðum er Gylfi Þór Sigurðsson í sérflokki þegar kemur að launum þar.
Samkvæmt útekt um laun leikmann þá þénar Gylfi um 900 milljónir á ári fyrir að leika með Everton, taka skal fram að um er að ræða laun fyrir skatta og gjöld. Á gengi dagsins í dag eru það rúmar 17 milljónir á viku.
Jóhann Berg Guðmundsson kantmaður Burnley er með tæplega helmingi lægri laun en Gylfi, Jóhann er sagður þéna rúm 50 þúsund pund á viku. Ensk blöð telja að árslaun hans séu um 470 milljónir á ári, vikulaun hans eru því í kringum 9 milljónir íslenskra króna.
Ef marka má svo enska fjölmiðla þá þénar íslenski landsliðsmaðurinn, Rúnar Alex Rúnarsson um 350 milljónir íslenskra króna á ári hjá sínu nýja félagi. Rúnar gekk í raðir Arsenal í haust og er sagður fá 40 þúsund pund í laun á viku sem gerir rúmar 7 milljónir íslenskra króna. Á mánuði gerir það um 30 milljónir.
