Gylfi Þór Sigurðsson, besti knattspyrnumaður Íslands og líklega besti landsliðsmaður í sögu þjóðar er spenntur fyrir því að vinna með Arnari Þór Viðarssyni. KSÍ staðfest í gær að Arnar Þór væri nýr landsliðsþjálfari og að Eiður Smári Guðjohnsen yrði honum til halds og trausts.

Arnar og Eiður Smári taka við liði sem hefur gert vel undanfarin ár, einhverjar áherslubreytingar koma með nýjum mönnum en lítill tími er til stefnu.

„Mér líst bara vel á hann, ég hef ekkert kynnst honum sem þjálfara en hef bara heyrt góða hluti um hann. Hann hafði verið í þjálfun erlendis um nokkurt skeið áður en að hann kom heim, vonandi kemur hann vel inn,“ sagði Gylfi Þór 433.is ræddi við hann í gær.

Ítarlegt viðtal við Gylfa um síðustu vikur hjá Everton, sögur um að hann væri á förum frá Everton i sumar og komandi hlutverk hans í lífinu birtist hér á vefnum á aðfangadag.

Ísland hefur leik í undankeppni Heimsmeistaramótsins í Katar, strax í mars á næsta ári. Þétt verður spilað. „Það eru mikilvægir tímar fram undan, undankeppnin byrjar strax í mars og hann fær ekkert mikinn tíma til að koma inn með sínar hugmyndir. Það eru þrír leikir í mars, það er mikilvægt að við byrjum vel strax.“

Íslenska liðið mætir Þýskalandi, Armeníu og Liechtenstein í mars og ljóst að Arnar færi aðeins tvær til þrjár æfingar í starfi áður en haldið er út í alvöruna.

„Venjulega eru fleiri dagar til æfinga fyrir fyrsta leik, það er stutt á milli núna þegar það er búið að bæta við þessum auka leiki. Það er erfitt að segja til um hvað hann ætlar að gera, við erum búnir að spila það lengi saman. Við vitum hvernig við náum árangri.“