Knattspyrnusamband Íslands borgaði FH bætur til að losa Eið Smára Guðjohnsen úr starfi þjálfara FH. Eiður Smári var í dag ráðinn aðstoðarþjálfari karlalandsliðs Íslands þegar Arnar Þór Viðarsson var ráðinn þjálfari.
Arnar og Eiður náðu góðum árangri saman með U21 árs landsliðið. Eiður hafði ráðið sig til starfa hjá FH eftir að hafa stýrt liðinu í sumar með Loga Ólafssyni.
Eiður fékk sig lausan úr starfinu hjá FH þegar KSÍ hafði sambandið. „Við komumst að mjög góðu samkomulagi um það, við áttum ágætis spjall um það. Það var til málamyndunnar sem við greiddum bætur út frá þessu raski sem FH-ingar verða fyrir að missa Eið Smára,“ sagði Guðni Bergsson formaður KSÍ á fréttamannafundi um málið í dag.
KSÍ hafði gefið Eiði Smára leyfi til að stýra FH í sumar þegar hann var með samning um þjálfun hjá U21 liðinu. Ekki kom fram í máli Guðna hversu há upphæðin var.
„Miðað við hvernig sá samningur var, þá var þetta auðsótt mál. Við áttum í góðum samskiptum, við létum Eið Smára til FH í sumar. Það gekk vel, ég vil þakka FH fyrir þennan skilning. Þetta gekk allt saman mjög vel.“