Eiður Smári Guðjohnsen mun láta af störfum sem þjálfari FH í efstu deild karla í knattspyrnu. Þetta herma öruggar heimildir 433.is.
Eiður var í dag ráðinn aðstoðarþjálfari A-landsliðs karla en hann tók við þjálfun FH um mitt sumar. Eftir gott gengi með FH í sumar var svo Eiður ráðinn til næstu ára í Hafnarfirði.
Hann mun hins vegar láta af störfum en óvíst er hver tekur við FH. Eftir að ljóst var að Eiður Smári færi aftur til starfa hjá KSÍ eru Logi Ólafsson og Ólafur Jóhannesson orðaðir við starfið í Kaplakrika.
Arnar Þór Viðarsson var í dag ráðinn landsliðsþjálfari karla en hann og Eiður Smári náðu frábærum árangri með U21 árs liðiðð.
Eiður Smári er markahæsti leikmaður í sögu landsliðsins ásamt Kolbeini Sigþórssyni.
Eiður Smári, sem er fæddur 1978 og hefur lokið UEFA B þjálfaragráðu, lék með 15 félagsliðum í 9 löndum frá árinu 1994 til 2016. Hann hefur leikið 88 A-landsleiki og skorað í þeim 26 mörk, auk fjölmargra leikja og marka fyrir yngri landslið Íslands.
Fyrstu leikir A landsliðs karla undir stjórn Arnars Þórs og Eiðs verða leikir í undankeppni HM 2022 – þrír útileikir í mars 2021. Þá hafa verið staðfestir tveir vináttuleikir í júní – útileikir gegn Færeyjum og Póllandi.