Lars Lagerback hefur hafnað því að taka við landsliðinu hjá Sameinuðu arabísku furstadæmunum. Frá þessu er greint í sænskum miðlum.
„Við höfum afþakkað þetta,“ sagði Per-Joar Hansen aðstoðarmaður Lagerback um málið.
Lagerback var rekinn frá Noregi á dögunum og er KSÍ búið að ræða við hann um að taka til starfa sem landsliðsþjálfari karla að nýju.
Ljóst er að starfið í Furstadæmunum var vel borgað og miklu betri laun en KSÍ getur boðið þeim sænska.
Hollendingurinn, Bert van Marwijk tók starfið eftir að Lagerback afþakkaði það en Sameinuðu arabísku furstadæmin stefna á HM í Katar árið 2022.
Fjöldi leikmanna Íslands vilja Lagerback aftur til starfa. „Ég myndi vilja sjá Lars koma aftur til Íslands, hann hóf þessa vegferð með Ísland og bjó til þann árangur sem við höfum náð,“ sagði Ari Freyr Skúlason við sænska miðla á dögunum.